Eldri borgarar VERÐA að láta í sér heyra. Grátkonan á Alþingi hjálpar ekki

31.maí 2017

Það var haldinn fundur á Austurvelli og mótmælt sameiningu skóla.

Það var haldinn annar fundur á Austurvelli fáum dögum síðar og var verið að mótmæla kjörum eldri borgara og öryrkja.

Á seinni fundinn mættu örfáar hræður, enda rigndi glatt.

Var það bara rigningin sem kom í veg fyrir sama fjölmenni og á fyrri fundinum? Ég efast um það. Hið dæmalausa sinnuleysi sem ríkir hjá okkur, eldri borgurum, um hag okkar og framtíð er óskiljanleg.

Grátkonan er komin á alþingi og grætur þar fyrir framan alþjóð vegna þess hve illa er komið fram við hana. Grátkonan góða er með á aðra milljón í laun á mánuði, og samt grætur hún.

Hefði nú ekki verið vænlegar fyrir hana, þ.e. grátkonuna, að fá sér eitthvað annað starf þar sem allir eru góðir við hana?

Mér finnst það móðgun við mig og þjóð mína að standa í ræðustól alþingis íslendinga og grenja af sjálfsmeðaumkun.

Það er búið að marg auglýsa hve vondir íslendingar hafa verið við þessa grenjandi frábæru konu. Það vita allir að hún á bágt að þurfa að díla við "betli" fólk sem nennir ekki að vinna.

Hún og hennar flokkur hefur sýnt svo ekki verður um villst að betlarar eiga ekki að hafa heimili á Íslandi. Betlarar eiga að vera í útlöndum. Þeir eiga ekki að þvælast fyrir þeim sem komu frá Ameríku til þess að auðga íslenskt mannlíf og eru nú komnir með sæmileg laun, loksins, eftir margra ára baráttu og hugsið ykkur, að þurfa að skúra til þess að sjá fyrir sér! Er það furða þó grátkonunni þyki þjóðin vanþakklát. Svona líka flottur grátur sést ekki á hverjum degi.

Ef þið eruð að ybba ykkur bara af því þið eruð í hjólastól ættuð þið að skammast ykkar. Vitiði ekki að grátkonan sér í gegnum plottið? Hún veit vel að þið eruð bara að plata og þykjast vera veik svo þið getið "betlað" af henni peninga.

Ekki betlar grátkonan. Ó nei, það hefur hún aldrei gert og svo er líka svo dásamlegt að hún þarf ekki að hafa áhyggjur af því að verða gömul. Hún er nebbla fyrrverandi þingmaður, þegar hún verður gömul, og þingmanna eftirlaun eru nú ekkert slor.

Hvað er þá til ráða fyrir okkur eldri borgara þessa lands?

Eigum við að fara skælandi niður á Alþingi í haust þegar þau koma öll sveitt og sæl eftir langt og gott sumarfrí?

Eigum við bara að láta troða okkur niður í svaðið og láta gráta yfir því hvað við erum óendanlega vanþakklát og ósvífin?

Kannski fáum við fallegt bréf frá Þorsteini Víglundssyni þar sem hann útskýrir fyrir okkur að við skiptum ekki máli. Við séum baggi á þjóðinni og ættum helst að fara til himna sem allra fyrst svo það þurfi ekki að púkka upp á okkur.

Kannski fer ungliðahreyfing Pírata að hugsa um að hún eigi jú afa og ömmur sem hafi það ekki allt of gott og þeim gæti dottið í hug að tala um þetta úr ræðustól á Alþingi í haust. Ekki fer ungliðahreyfingin að grenja fyrir framan alþjóð. Nei þeir eru sko alvöru fólk.

Svo er það Gráhærða fína fólkið í hernum sem er þrælupptekið við að útvega húsnæði og viðurværi fyrir BBC fólkið sem kemur í sumar til þess að kynna sér aðstæður þeirra sem eru yfir 50 ára á Íslandi.

Er þetta ekki dásamlegt allt saman?

Bjart og fallegt framundan og ekki versnar það við að auglýsa í útlöndum hin dásamlegu kjör þeirra sem ætla sér að vinna fram í rauðann dauðann og nú er komin fram hávær hugmynd um að eldri borgarar þurfi á þing.

Hver kemur fyrst upp í hugann sem væntanleg grátkona? Jú, einmitt. Formaður Landssambands eldri borgara. Skyldi það verða raunin að hún sé nú að stefna inn á þingið til þess að eyða næstu árum í þykjustuleik fyrir eldri borgara?

Eldri borgarar verða að finna einhver ráð til þess að bæta kjör sín án þess að senda einhvern lepp inn á þing, lepp sem verður algjörlega gagnslaus.

Ég skora á eldri borgara sem tilheyra ekki 14% hópnum að láta heyra í sér. Það geta ekki allir hafa kosið BB eða afkvæmi Sjálfstæðisflokksins, það bara getur ekki verið.

Hulda Björnsdóttir

 

Grái herinn hefur komið sínu fram fyrir 14% eldri borgara

29.maí 2017

Ég er æf.

Nú hefur Grái herinn uppskorið eins og hans sáði.

Hann hefur andskotast í stjórnmálamönnum. Í fjölmiðlum og hamast og heimtað að þeir sem stunda atvinnu eftir að þeir fara að fá eftirlaun fái hækkað frítekjumark.

Þórunn H og Helgi P voru í viðtali eftir viðtali þar sem þau hömuðust. Þau fóru á fund stjórnmálamanna og  hömruðu á þessu eina áhugamáli sínu sem snerti eldri borgara.

Ég hlustaði á þessi viðtöl og varaði við þessum málflutningi.

Nú hlýtur Grái herinn og þeir sem þar eru í forsvari að hoppa hæð sína í loft upp. Þau hafa náð árangri sem þau stefndu alltaf að. Árangri fyrir 14% eldri borgara. Þeim er skítsama um 86% eldri borgara sem ekki eru á vinnumarkaði. Það fólk getur bara etið það sem úti frýs og haldið sér á mottunni.

Voru eldri borgara einhvern tíma spurðir, áður en herinn fór að hamast, hvað þeim fyndist um hærra frítekjumark fyrir þá sem eru á vinnumarkaði? Hærra frítekjumark en fyrir þá sem hafa greiðslur frá lífeyrissjóðum?

Ekki var ég spurð.

Þau spurðu líklega aldrei neinn. Jú, þau spurðu þá sem stjórnuðu herferðinni.

Þessi her ætti að skammast sín. Hann ætti að hætta að þykjast vera að vinna fyrir aldraða. Hann er að vinna fyrir mjög þröngan hóp en hefur logið sig inn á rúmlega 7 manns með fögrum orðum í stefnuyfirlýsingu sem hefur ekkert að segja. Það er auðvelt að setja saman orð. Það eru verkin sem tala, ekki fagurgali.

Hvað með 86 % eldri borgar sem ekki eru á vinnumarkaði? Hvað hefur þessi her gert fyrir þá?

ekkert, nákvæmlega ekkert.

Fari þetta mál í gegnum þingið hefur herinn hunsað 86% eldri borgara til þess að þóknast 14%. Svona kallast í mínum huga SPILLING AF VERSTU GERÐ og ég er æf.

Ég hef varað við þessum málflutningi frá fyrstu tíð og ég heyrði viðtöl á viðtöl ofan þar sem þetta fólk hamraði út í eitt  og nú hefur það fengið ósk sína uppfyllta.

Burt með þennan her af vettvangi mála eldri borgara. Hann er hættulegur málstaðnum.

Herinn hefur fært Bjarna Ben og þeim sem ráða afsökun á gullfati og hvað ætlar fjandans herinn að segja þegar kemur að næstu ræðu ríkisstjórnarinnar um allt það sem hefur verið gert fyrir eldri borgara?

Hvar eru þeir sem hafa verið að skrifa um kjör eldri borgara núna. Ætla þeir að láta þetta fara framhjá sér þegjandi og hljóðalaust, eða hvað?

Hafi ég orðið hamslaus af reiði þá er þetta aftek hersins vel á veg komið með að henda mér þangað.

Hulda Björnsdóttir

 

Vandræðagangur Trumps - Vandræðagangur á Alþingi

28.maí 2017

Nú er Trump kominn heim og þar er allt í vitleysu hjá honum, allavega er Hvíta húsið í einhverjum vandræðaskap, endalaust.

Sérfræðingar tala um að reynsluleysi valdi þessu flestu.

Ég er ekki sérfræðingur en það getur vel verið að þetta sé rétt. Tengdasonur hans er að minnst kosti ekki með mikla reynslu á stjórnmálasviðinu. Blessaður kallinn hann Trump heldur líklega að hann sé enn í sjónvarpinu og raunveruleika sjónvarpið sé hans. Nú er hann farinn að tvitta aftur og voða gaman hjá honum.

Það var þó gott að sjá hann hjálpa Melanie niður stigann þegar þau komu heim, ég meina flugvélastigann. Þetta eru rosalega háir hælar sem konan skartar og auðvitað þarf hún stuðning. Hann var þó fljótur að sleppa henni þegar komið var niður á fast land. Auðvitað getur hann ekki verið með hana við hlið sér, hvað þá haldið í höndina á henni. Hún á að labba nokkur skref á eftir honum, það skilur auðvitað hver heilvita maður.

Já, mér dettur svo margt í hug og þegar verið var að tala um vandræðaganginn í Hvíta húsinu, vegna reynsluleysis datt mér Alþingi Íslendinga í hug.

Getur það ekki bara verið að allt sé í vitleysu þar vegna reynsluleysis unga fólksins sem ætti kannski að klára skólann áður en það fer að stjórna landinu.

Kæmist Panamaprinsinn upp með að valta yfir allt og alla ef á þingi sætu menn og konur sem hefðu bein í nefinu og gætu staðið í honum?

Væri formaður velferðarnefndar "fátæki" fulltrúinn, formaður ef það væri um auðugan garð að gresja fyrir slík embætti?

Svo ætti finnst mér að taka símana af þingmönnum á meðan þingfundur stendur yfir. Það er hrikalegt að sjá þá, háa sem lága, liggja yfir símanum í stað þess að hlusta með athygli á umræður. Þegar komið er inn í þinghúsið á að hengja símana upp með yfirhöfninni.

Auðvitað hef ég ekkert vit þessu, er komin yfir miðjan aldur og á ekki að skipta mér af því sem mér kemur ekki við og hef alls ekkert vit á. Best fyrir svona fólk eins og mig að þegja.

Líklega er lokið fundi á Austurvelli þar sem mótmælt hefur verið sameiningu skóla. Mótmæli á vegum ungliðahreyfingar Pírata held ég.

Mér datt í hug hvort það hefði ekki verið hægt að sameina mótmæli vegna bágra kjara öryrkja og eftirlaunafólks og sameiningu skólanna

Þetta var bara hugmynd vegna fjölda sem kæmi til með mæta á völlinn.

Mér var vinsamlega bent á að ungliðahreyfing Pírata stæði að skólamótmælunum og þar sem þau væru ung skipti þetta meira máli fyrir þau en kjör hópanna sem ég var að tala um.

Mikið ægilega er það sorglegt að ungliðahreyfingin skuli vera svona munaðarlaus. Ég fer næstum að gráta þegar ég hugsa um allt þetta unga fólk sem á enga foreldra og engar ömmur eða afa eða frænkur og frændur sem hafa klárað skólann eða eru jafnvel komin yfir miðjan aldur. Þetta er og ætti að vera rannsóknarefni fyrir fræðimenn; Hvers vegna þetta blessaða fólk er allt svona eitt í heiminum.

Hulda Björnsdóttir 

 

Ýmsar myndir ofdrykkjunnar ! Viljum við brennivín í búðir ?

1. Móðir hringir í dóttur sína og biður hana að koma strax. Móðirin þarf hjálp. Sonurinn hefur komið heim dauðadrukkin, illur og ragnandi, en er nú dauður á stofugólfinu. Dóttirin biður vin sinn að koma með sér. Hún er hrædd. Vinurinn kemur og þau fara saman inn í stofuna eftir að hafa rætt við móðurina sem situr skjálfandi á eldhússtól. Bróðirinn liggur í ælunni og bærir ekki á sér. Þetta er litli bróðir dótturinnar. Hún hefur aldrei séð hann svona. Henni verður mikið um og sest á gólfið hjá honum og grætur. Hvernig gat þetta gerst? Móðirin fer með vininum fram í eldhús og segir á leiðinni út: Hún hefur aldrei séð hann svona. Nei, systirin vissi að drengurinn drakk en það er öðruvísi að sjá afleiðingarnar fyrir framan sig í mynd algjörrar niðurlægingar. Dóttirin og vinurinn drösla þeim dauða upp í rúmið og eftir situr ælan á stofugólfi móður sem kallaði á hjálp.

 

2. Síminn hringir. Dóttir þín hefur reynt að fyrirfara sér en var bjargað á síðustu stundu, segir rödd í símanum. Ha? Dóttir þín er á spítala eftir að hafa skorið sig á púls. Það var fólk í íbúðinni sem fann hana inni á baði, segir röddin. Móðirin verður ísköld. Það er eins og frost hönd hafi gripið um hjartað. Hvað á ég að gera? spyr hún. Farðu á heilsugæsluna og fáðu aðstoð, svarar röddin. Þessi rödd kemur einhvers staðar langt úr fjarska. Það hlýtur að vera eitthvað að símanum. Skilaboðin komast ekki inn í skilningarvit móðurinnar en hún fer á heilsugæsluna og fær upplýsingar. Jú, þetta er rétt. Sektarkennd heltekur dofinn heila móður sem hefur horft upp á barnið sitt í langan tíma drekkja lífinu í brennivíni.

 

3. Enn hringir síminn og dóttir grætur og biður móður sína að koma og sækja sig. Unnustinn hefur barið dótturina í spað. Hann er drukkinn. Hún hefur flúið í aðra íbúð og þar felur hún sig. Móðirin sækir hana og fer með á slysavarðstofuna. Miklir áverkar eru á líkama dótturinnar. Þær fara heim til móðurinnar og þar dvelur dóttirin í 2 daga en fer svo aftur heim til unnustans og sagan endalausa hefst á ný. Þetta gæti allt lagast. Hann er svo dásamlegur þegar hann er ekki drukkinn.

 

4. Þegar nýja húsið er hannað sér móðirin til þess að öruggur útgangur sé frá efri hæðinni. Hún verður að vera þess fullviss að komi sonurinn og brjótist inn geti hún bjargað sér og börnunum. Sonurinn er eiturlyfjaneitandi og hatar móður sína. Hún býr ekki með honum en er í fjötrum fíknarinnar vegna neyslu hans. Hún á enga undankomuleið. Hann missir vitið þegar eitrið vellur um líkamann. Móðirin er djöfull í hans augum og hún verður að deyja. Móðirin hefur lifað við þennan ótta árum saman og það er að gera út af við hana. Hún getur ekkert gert.

 

5. Sonurinn kemur heim með vini sína. Þeir eru allir vel við skál. Móðirin flýr þegar þeir gerast háværir og sonurinn skipar henni að fara út. Hún fer út í frostið, á kjólnum einum og inniskónum. Kápan er inni í skáp í stofunni og þar eru vinirnir svo hún gat ekki sótt hana. Hún ráfar um götur borgarinnar og það tekur að dimma. Vinir rekast á hana helkalda og skjálfandi og taka hana með sér. Þeir taka hana með sér heim til sín og hlúa að henni. Hún getur ekki farið á sitt heimili. Þar er brennivíns gleði og mæður ekki velkomnar. Hún snýr heim eftir nokkra daga. Það er runnið af syninum og hann skilur ekkert í því hvar hún hafi haldið sig og ekki eldað fyrir hann !

 

6. Fjölskyldan býr í einu herbergi á hæð þar sem 4 íbúðir eru. Allar eitt herbergi. Sameiginlegt salerni og sturta fyrir alla. Þessi fjölskylda er reglusöm en hún er fátæk. Í næstu íbúð býr drykkjumaður. Þegar vínið tekur völdin er barnið óttaslegið og þorir ekki út úr íbúðinni. Það er ekki hægt að komast á salernið og ekki hægt að fara í skólann. Maðurinn við hliðina gæti heyrt umganginn. Allir hafa hljótt því ekki má raska ró íbúans í næstu íbúð. Fátækt og nábýli móta barnið. Það er ekki drykkja á heimilinu en afleiðingarnar eru þær sömu, einfaldlega að búa í næstu íbúð stjórnar öllu.

 

7. Það er nótt. Allir í fasta svefni. Síminn hringir. Leigubílstjóri kynnir sig. Hann segist vera með unga konu í aftursætinu sem sé dauðadrukkin og hún hafi beðið um að hringt yrði í þetta númer. Konan sem svarar í símann segir manninum að keyra ungu konuna á lögreglustöðina. En ert þú ekki móðir hennar? spyr bílstjórinn. Jú, svara konan, ég get hins vegar ekkert gert fyrir stúlkuna og SÁÁ hefur sagt mér að loka dyrunum því það sé eina leiðin til þess að bjarga sjúklingnum. Bílstjórinn er nærgætin og kveður. Móðirin grætur. Barnið hennar er að drepa sig á brennivíns drykkju.

Margar fleiri sögur gæti ég sagt en læt þessar duga. Fyrir þá sem eru í hinu skelfilega hlutverki aðstandandans, hvort sem það er ættingi eða vinur, vinnufélagi eða maki, eru sporin erfið. Brennivín drepur fjölskyldur. Það drepur góða einstaklinga bæði andlega og líkamlega. Brennivínsbölið er eitt af stærstu vandamálum margra.

Ég man þá tíma þegar rónarnir biðu eftir því að matvörubúðirnar og apótekin opnuðu á morgnana. Kökudroparnir og sprittið gæti linað þynnkuna og komið þeim af stað inn í daginn. Þeir áttu líklega ekki peninga til þess að kaupa pela í ríkinu og létu sér nægja kökudropa og spritt. Sprittið var skammtað.

Nú vilja margir á alþingi selja brennivín við hliðina á kökudropunum og mjólkinni.

Áður en þeir samþykkja svona lög væri upplagt fyrir þá að sitja einn fund í Alanon með aðstandendum fíkniefnaneytanda og alkóhólista. Það væri líka gott að fara í heimsókn á meðferðastofnun og fá að sitja kynningarfund Alanon. Í lok fundar væri ekki úr vegi að ræða við þá sem eru að berjast við fíknina og heyra hvað þeim finnst um hið mikilvæga mál "brennivín í almennar búðir". Síðan er hægt að enda á höfuðstöðvum SÁÁ.

Hvort þetta gæti breytt viðhorfinu veit ég ekki en þarna eru staðreyndirnar og sögurnar sem vert er að hlusta á.

Hlustar þingheimur á þjóðfélagið? Ég veit það ekki.

Hulda Björnsdóttir

Af hverju verða menn öryrkjar ?

26.maí 2017

Ég velti því dálítið fyrir mér hvers vegna öryrkjum hefur fjölgað svo mjög á Íslandi. Hvað veldur því og hvernig er örorkan?

Ég ólst upp hjá öryrkja sem hafði fengið berkla í lungun mjög ung og var blásin. Fólk sem var blásið beið þess oft aldrei bætur og var hún ein af þeim. Hún fékk oft blóðspýting og voru það hræðilegir tímar og ég hræddari en orð fá lýst. Svo braut hún handlegg og brotið greri skakkt þannig að höndin nýttist ekki nema að hluta.

Það var mjög takmarkað sem hún gat unnið en hún reyndi eins og hún gat.

Þessi reynsla mín segir mér að öryrkjar séu ekki aumingjar eins og stundum virðist látið í veðri vaka.

Nú á dögum eru líklega margar ástæður fyrir því að fólk verður öryrkjar. Sumir slasast, aðrir fæðast á einhvern hátt fatlaðir og enn aðrir veikjast af sjúkdómum sem erfitt eða ómögulegt er að lækna.

Sumir verða öryrkjar af áfengisdrykkju og aðrir veikjast á geðinu.

Frú "fátækimála" vill að öryrkjar fari út á vinnumarkaðinn til þess að þeir hætti að "betla" bætur frá ríkinu.

Ég hef velt þessu fyrir mér fram og til baka og er að reyna að skilja hvernig hún kemst að þessari niðurstöðu og um hverja hún er að tala. Er konan í sambandi við raunverulegt líf eða lifir hún í Trump heimi þar sem allt er svo "very very very good".?

Ég veit það ekki.

Hún getur ekki átt við þá sem fæðast fatlaðir.

Hún getur ekki átt við þá sem eru í hjólastól lamaðir og geta sig vart hrært hjálparlaust.

Hún getur ekki átt við þá sem hafa til dæmis misst sjónina af einhverjum ástæðum eða jafnvel fæðst blindir.

Hún gæti átt við þá sem eiga við áfengis vandamál að stríða. Það sést oft ekki utan á þeim hvað þeir eru veikir.

Hún gæti líka átt við þá sem eiga við geðræn vandamál af öðrum toga að stríða en eru í raun líkamlega nokkuð hressir.

Líklega hefur hún aldrei verið innan um geðsjúkt fólk eða þá sem falla niður í dýpstu hyldýpi depurðar og vonleysis.

Mér finnst ekki ólíklegt að hún haldi að þeir sem líta út fyrir að vera líkamlega heilbrigðir geti ekki verið öryrkjar og séu bara letingjar og aumingjar sem svíkja út úr kerfinu af því þeir nenna ekki að vinna.

Þá kem ég að því að velta fyrir mér hvers vegna geðræn vandamál virðast vera svo algeng á landinu græna? Getur það verið að lág laun, slæmt viðurværi og aðbúnaður venjulegs fólks leiði til svo mikillar örvæntingar að fólk verði hugsjúkt?

Getur það verið að í velferðarríki "fátæki" fulltrúans sé til fólk sem rís ekki undir því að eiga ekki fyrir mat handa börnunum sínum eða fyrir læknisþjónustu sem fjölskyldan þarf á að halda?

Er hugsanlegt að fólkið sem á hvergi heima, vegna þess að húsaleiga er þeim ofviða, haldi ekki andlegri heilsu sinni?

Getur það verið að unga konan eða ungi maðurinn sem hefur misst allt sitt vegna græðgi hinna ríku sjái ekki fram á að komast upp úr hjólfarinu og séu svo pikkföst í fátækra gildrunni að þau veikist andlega og verði óvinnufær?

Eru þetta öryrkjarnir sem sú útlenska vill senda út á vinnumarkaðinn til þess að spara ríkinu?

Sé svo er hún líklega að byrja á vitlausum enda. Það er skorið niður í heilbrigðiskerfinu og fólk fær ekki þá hjálp sem er nauðsynleg til þess að ná sér andlega. Væri ekki nær fyrir hina ágætu konu, sem hefur komið ár sinni vel fyrir borð á kostnað íslenskra skattgreiðanda, að sjá til þess að fyrst væri fólkinu hjálpað við að ná heilsu og svo kæmi að því að vinnuveitendur tækju við.

Hvaða vinnuveitandi vill fá til sín mann eða konu sem fellur saman og er frá vinnu dögum og vikum saman vegna andlegrar vanlíðunar? Hefur þingmanninum dottið í hug að beita sér fyrir vernduðum vinnustöðum fyrir fólk sem er að ná sér eftir erfið veikindi?

Ég efast um að þingmaðurinn hafi vit til þess að hugleiða einfaldar leiðir til úrbóta og það sem hún hafi til málanna að leggja sé á þá leið að festa fólk í "fátæki" gildrunni og  að hún gefi lítið fyrir og láti sig engu skipta hvernig almenningi reiðir af.

Er hugsanlegt að við séum að búa til þjóðfélag sem vill helst losna við sem flesta, annað hvort til útlanda eða í dauðann, svo fólk eins og "fátæki" nefndarformaðurinn virðist vera að amast við sé ekki að þvælast fyrir?

Mjög fáir eru öryrkjar af því að það sé svo fínt.

Flestir eru öryrkjar af því að heilsan hefur brugðist.

Getur einhver troðið þessu inn í hausanóturnar á "fátæki" nefndarformanninum, please ! Mér er nákvæmlega sama á hvaða máli það er gert, bara að það beri árangur.

Hulda Björnsdóttir

 

Landsfundur Landssambands eldri borgara

26.maí 2017

Þessi fundur var haldinn núna á dögunum og frá honum kom löng ályktun um hvað heimta skyldi af löggjafanum.

Mér finnst þetta orðalag "krefst..." eitthvað svo leiðinlegt.

Ályktunin er að mörgu leyti góð en sumt er nokkuð langsótt finnst mér.

Þess er krafist að persónuafsláttur hækki þannig að hann fylgi hækkunum launavísitölu frá árinu 1988. Þetta er semsagt leiðrétting aftur í tímann fyrir ALLA, sama hvort tekjur eru 200 þúsund á mánuði eða 2 milljónir á mánuði. Er þetta ekki eitthvað einkennilegt? Gengur þetta upp? Það er verið að tala um 29 ára leiðréttingu aftur í tímann.

Hvað ætti persónuafsláttur þá að vera hár núna? Veit það einhver af því ágæta fólki sem samdi þessa ályktun?

Síðan er talað um að tryggt sé að persónuafsláttur hækki árlega í samræmi við launavísitölu.

Ég er sammála því að besta kjarabót fyrir láglaunafólk og þá sem eru á örorkubótum eða komnir á eftirlaun, væri hækkun skattleysismarka. Ég hef ekkert legið á þessari skoðun minni og held því fram að ríkissjóður tapaði ekki á þessu því neysla fólks mundi aukast og óbeinir skattar kæmu til baka.

En að ætla sér að leiðrétta persónuafsláttinn 29 ár aftur í tímann getur ekki gengið.

Hér finnst mér enn og aftur verið að setja fram kröfur sem líta flott út á pappírnum en geta aldrei gengið upp.

Ég held að það sé vænlegrar til árangurs að hafa kröfur þannig að hugsanlega sé hægt að rökstyðja þær og sína fram á að þær séu raunhæfar. Kröfur út í hött drepa málum á dreif og gera ekkert annað en skemma fyrir því sem væri hægt að gera ef litið væri á raunveruleikann en ekki lifað í draumaheimi sem aldrei rætist.

Annað í þessari ályktun eða kröfugerð fundarins er að taka ætti upp samstarf við samtök launamanna til þess að berjast fyrir bættum kjörum aldraðra í landinu. Ég rek auðvitað augun í þessa setningu. Kjör aldraðra í landinu. Einmitt, enn og aftur sýnir félagsskapur eldri borgara hug sinn til þeirra sem velja að búa erlendis síðustu ár ævi sinnar. Það er aldrei minnst á það óréttlæti sem viðgengst gagnvart þeim sem búa ekki á Íslandi en hafa greitt skatta og skyldur þangað alla sína starfsævi. Nei, þetta fólk getur bara etið það sem úti frýs og haldið sér saman.

Auðvitað er það eðlilegt að samtök launamanna taki þátt í því að berjast fyrir kjörum þeirra sem eru láglaunafólk og þeirra sem komnir eru á eftirlaun. Láglaunafólk og eftirlauna þegar eru spyrt saman í augum hins opinbera og því vettvangurinn eðlilegur.

Ég læt það fara í taugarnar á mér þegar sagt er að Tryggingastofnun lækki greiðslur til eftirlaunafólks afli það sér viðbótartekna.

Tryggingastofnun ræður engu um þetta. Hún gerir það sem löggjafinn segir henni að gera. Tryggingastofnun gefur ekki út lög og reglugerðir. Hún reynir að fara eftir bullinu sem rennur frá Alþingi og gerir sitt besta til þess að leiðrétta ambögur sem fljóta áfram vegna þess að þingheimur nennir ekki að sinna vinnunni sinni og fylgjast með því hvað verið er að samþykkja á hinu háa Alþingi. 

Tryggingastofnun er valdalaus.

Þetta ætti fólk sem er í forystu fyrir Landssamband eldri borgara að vita.

Það þýðir ekkert að rífast í Tryggingastofnun og benda á hana varðandi lögin og reglugerðirnar.

Það er hægt að rífast og æsa sig yfir starfsháttum stofnunarinnar og hvernig mál eru unnin þar en ekki yfir lögum og reglugerðum.

Tryggingastofnun er ekki einu sinni ráðuneyti, ef einhver heldur það.

Hulda Björnsdóttir

 

 

Matur - megrun - hreinsun - og Costco

26.maí 2017

Ég held að ég sé farin að skrifa endalaust um mat en get ekki haldið aftur af mér.

Það er margt alveg frábært sem kemur á netinu um mat og matarræði og svo er líka fullt af alls konar bulli sem fólk gleypir hrátt og heldur að það hafi fundið hina einu sönnu lausn.

Alls konar skyndilausnir og frábær ráð tröllríða samfélaginu og allir eiga að verða bumbulausir á nokkrum dögum, bara með réttu matarræði eða nokkrum magaæfingum og svona get ég röflað áfram endalaust.

Spik er vandamál.

Spik er í flestum tilfellum áunnið og hefði verið hægt að koma í veg fyrir það? Er það svo? Ég er ekki sérfræðingur í spikmálum eða lausnum þeirra. Ég held hins vegar að ég hafi nokkuð gott vald á spiki hjá sjálfri mér.

Það er ekki til staðar. Ekkert auka spik á mínum kroppi. Auðvitað gæti ég hæglega fallið í súkkulaðiát og etið kökur og kransa alla daga eða bakað hnallþórur og leyft matnum mínum að taka sundsprett í fossandi olíu á fínu pönnunum mínum.

Flotta nýja lækna teymið mitt á nýju heilsugæslustöðinni minni í Lousa vigtaði mig og mældi blóðþrýsting í fyrsta skipti sem ég kom þangað, fyrir nokkrum mánuðum.

Þetta er venjulega gert um það bil einu sinni á ári ef allt er eins og það á að vera. Semsagt fylgst með þyngd allra og ekki veitir af hér í bumbulandinu okkar.

Læknirinn minn sagði mér að ég væri innan marka með rétta þyngd en ekki þyrfti mikið að bætast við til þess að ég færi yfir markið. Ég er 170 sentímetrar á hæð og 70,1 kíló að þyngd.

Mér finnst súkkulaði ægilega gott og hnallþórur frábærar. Stundum fæ ég þessa yfirþyrmandi löngun í eitthvað sætt og gott en sem betur fer er aldrei til sykur á heimilinu og súkkulaði kom í heimsókn í fyrra en er enn þá inni í skáp og líklega dettur það í ruslatunnuna fyrr en varir. Það er ekki hægt að geyma það endalaust. Hnallþóru hef ég ekki bragðað í áratugi svo það er bara minningin sem er að hrekkja mig.

Ég passa upp á matarræðið mitt eins og ormur á gulli. Það er hluti af lífs stíl mínum.

Um daginn sá ég frábæra uppskrift af jógúrt morgunmat!

Jamm, eitthvað hafði lífskúnstner þeirrar uppskriftar ruglast í ríminu. Þetta var flott uppskrift af kókosmjólk úr dós sem hafði verið þykkt með CIA fræjum og ávöxtum bætt út í. Vola, komið jógúrt fyrir alla fjölskylduna. Það er líka hægt að þykkja eitt og annað með frosnum banana (bara innskot frá mér).

Ég bý stundum til jógúrt heima hjá mér úr heimatilbúinni sojamjólk af því ég drekk ekki kúamjólk, bara sérviska auðvitað. Mér hefur aldrei dottið í hug að búa til jógúrt úr kókosmjólk úr dós. Kannski er það hægt með jógúrt gerlum, ég bara veit það ekki, en hitt veit ég að uppskriftin sem ég er að tala um innihélt ekkert, nákvæmlega ekkert, sem tengdist jógúrt gerð. Ég er þeirrar skoðunar að það sé ábyrgðar hluti að telja fólki trú um hitt og þetta ! Það er fullt af auðtrúa manneskjum sem leita grimmt eftir skyndilausnum til þess að losna við bumbur og spik.

Það eru engar skyndilausnir til. Ekkert flóknara en það.

Vatn, prótein og trefjar eru lífsnauðsynleg öllum. Vatn og prótein er líklega ekki að vefjast mikið fyrir fólki en trefjarnar sitja á hakanum. Þær eru eins og heimilislaus umrenningur. Flestum eða mörgum alveg sama um þær. Fljótlegt að skella káli og safa úr ávöxtum í blandara og kannski pínu lítið af duft próteini en trefjarnar fá ekki far með lestinni.

Algengt vandamál hjá fólki er að það gætir ekki hófs og leyfir öllu, líka trefjum, að detta inn um munninn.

Kúrahreinsun, ég veit ekki hvað það er, en líklega ágætt fyrir líkama og sál. Ég ætla ekkert að tala um hana núna. Það yrði ekki vitræn umræða hjá mér og ég sleppi henni í bili en gæti tekið flug þegar vel lægi á mér.

Þá er komið að Costco og skoðun minni á magninnkaupum.

Ég efast ekki um að þessi nýi verslunarmáti hafi áhrif á verðlag á Íslandi og er ekkert annað en gott um það að segja. Ég fer stundum í svipaða miðstöð hér í Coimbra og gerði líka þegar ég bjó í Kína. Sú heitir Metro í Kína og Makró í Portúgal. Mér leiðist að fara í búðir og kaupi það sem endist mér út mánuðinn í einni ferð. Þetta þýðir að ég mundi líklega versla í Costco ef ég byggi á Íslandi. Metro og Makró eru bara fyrir þá sem reka fyrirtæki og þó nokkur skriffinnska tengist umsókn en það eru krókaleiðir sem hægt er að komast með hjálp góðra vina.

Vonandi verður nýja verslunin á Íslandi til þess að aðrar búðir lækka verð.

Í allri sæluvímunni gleymdist eitt.

Það er hópur íslendinga sem geta ekki verslað í svona fyrirbæri. Þeir hafa ekki efni á því!

Til þess að spara þarf oftar en ekki að eiga peninga !

Ótrúlegt en satt.

Hvað ætli það séu margir sem draga fram lífið á lágmarkslaunum, á örorkubótum eða lágmarks ellilífeyri, sem geta farið í innkaupaferðir í Costco?

Þeir sem þurfa að lifa frá degi til dags og velta hverri krónu að minnsta kosti fimmtíu sinnum fyrir sér geta ekki gert hagstæð stórinnkaup.

Fyrir láglaunahópana er þessi viðbót, sem nú er mikið dásömuð, og margir geta nýtt sér, gagnslaus. Hins vegar gæti það gerst að venjulegar verslanir neyðist til að lækka verð svo samkeppnin drepi ekki einkaframtakið. Það yrði bót fyrir þá sem við megum helst ekki tala of mikið um, óhreinu börnin hennar Evu!

Óholl vara er ódýrari en holl!

Getur það verið?

Holl vara er ekki fyrir þá sem lepja dauðann úr skel.

Sparnaður er ekki fyrir þá sem eiga ekki peninga.

Skýtur þetta ekki skökku við?

Hreyfing, hollur fjölbreyttur matur og andlegt jafnvægi er lykillinn að góðri heilsu.

Fyrir hverja er þessi lífstíll?

Ætti það ekki að vera kappsmál hverrar þjóðar að allir, ALLIR þegnar þjóðfélagsins ættu möguleika á því að uppfylla þessar grunnþarfir?

Vaknið, þið sem stjórnið landinu ! Einn góðan veðurdag gæti allt breyst í lífi ykkar og fótum kippt undan gleðinni og þið komin í gildru fátæktar, sömu gildruna og þið búið þeim sem minnst mega sín í Íslensku þjóðfélagi í dag.

Hulda Björnsdóttir

 

 

 

 

 

 

 

Hvítir leggir - brúnkukrem

24.maí 2017

Í dag er ótrúlega heitt, aftur! 32 stig nú þegar klukkan er ekki nema rúmlega 10. Það er von á rigningu á morgun og veitir eiginlega ekki af. Við erum að verða vatnslaus í landinu vegna þurrviðris. Ótrúlegt en satt.

Ég fékk hálfgert samviskubit í morgun þegar ég var að vökva blómin en hugga mig við að græna lífið hjálpi náttúrunni.

Ég er þeirra gæfu aðnjótandi að hafa hvíta leggi, hvíta eins og liðið lík.  Þegar ég var í Kína þótti þetta dásamlegt því þau vita ekkert verra en ef litur kemur á húðina og eru til dæmis öll krem þar með hvíttingu.

Jæja, söngkennarinn minn ráðlagði mér í fyrra að fá mér brúnkukrem til þess að  bera á leggina og gerði ég það. Mig minnir að ég hafi notað það nokkrum sinnum en nú er komið nýtt sumar og ég enn með lík leggi, snjóhvíta og þykir mér það ekki auka á fegurð mína.

Þar sem gærdagurinn var kjóla eða pils dagur sáust leggir mínir vel og nú skyldi setja brúnkukrem á líkin. Gerð ég það og skildi ekkert í því hvað lítill munur sást eftir um það bil 2 klukkutíma. Líklega var þetta krem mitt eitthvað einkennilegt, eða þannig.

Klukkan 3 varð mér aftur litið á leggina.

Hm, eitthvað mikið hafði gerst. Þeir voru fallega brúnir, ekki dökkir, bara svona smá hraustlegir. Verður mér svo litið niður á fótinn sjálfan til þess að dást að listaverkinu og bregður heldur betur. Fóturinn er snjóhvítur, alveg eins og lík. Þetta getur ekki verið, leggirnir fallegir og löppin hvít.

Ég hafði gleymt að bera á fótinn, hugsaði bara um leggina. Ekki gott mál en nú verð ég líklega að vera í sokkum, svona pínu litlum, til þess að fela hvíttið !

Það er ekki á mig logið. Vitleysan rennur ekki bara upp úr mér, hún hefur tekið sér bólfestu í höndunum líka.

Í næstu viku fer ég í einhverja viðbjóðslega rannsókn og þarf að hætta að borða almennilegan mat nokkrum dögum áður. Ég var spurð í gær hvort ég vildi heldur að kona gerði þessa rannsókn? Svo heimskuleg spurning. Hvað ætli mér sé ekki sama. Ég verð svæfð og hef ekki hugmynd um hver er að gera hvað.

Ég má ekki koma eftirlitslaus. Það verður að vera einhver sem getur tekið ábyrgð á mér. Þegar ég spurði hvort ég gæti ekki komið ein ef ég sæi um að verða sótt gerðist eitthvað.

Ætlar þú að koma með bussinum? spurðu þau

Nei, ég var nú að velta fyrir að taka leigubíl, svaraði ég

Já, það ætti að vera í lagi, sagði sú stutta en hún var ekkert sérlega hamingjusöm með þetta svo ég bað vinkonu mína að taka ábyrgð á mér. Sent og sótt er skilyrðið. Aðgerðin er ekki fyrr en klukkan 6 um kvöldið svo líklega verð ég ekki komin heim fyrr en um miðnætti. Svo sem allt í lagi þar sem ég verð í fylgd fullorðinna.

Sú stutta veit að ég er ekki yfir mig áhugasöm um að láta þetta yfir mig ganga, þ.e. svona krukk, og hún marg bað mig að missa nú ekki kjarkinn. Auðvitað geri ég það ekki en ég vil ekki fara í þessa fjandans aðgerð en verð að gera. Ég lofaði mínum dásamlega DR. Daníel og Dr. Jorge að gera þetta. Ekki get ég svikið þá !

Svona getur lífið nú leikið við mann,bara að koma auga á jákvæðu hliðina og sú sem er þessu hjá mér heitir:

Aðgerðinni lokið !!!!

Leggirnir verða líklega orðnir hvítir aftur þegar ég leggst á borðið hjá herramanninum en það kemur dagur eftir þann dag og meira brúnkukrem á leiðinni. Næst gleymist ekki að stússa við lappirnar líka. Þær mega ekki verða útundan aftur. Það er alveg ljóst, rétt eins og að eftir dag kemur nótt.

Hulda Björnsdóttir

 

Hvernig er það eiginlega að eiga afmæli?

24.maí 2017

Í fyrradag átti ég afmæli og eignaðist eitt ár enn eins og við segjum hér í landinu mínu.

Mér finnst þetta orðatiltæki "að eiga svo og svo mörg ár" ótrúlega fallegt. Við erum spurð um aldur okkar og segjum "ég á .....ár."

Núna á ég 72 ár.

72 ár er hellingur. Eiginlega bara nokkuð gott. Margir ná ekki svo háum aldri og sumir sem eru hér í lífinu hafa fengið nóg.

Ég veit svo sem ekkert hvernig þetta ár verður eða hve mörg ég eignast í viðbót en eitt veit ég þó. Ég ætla að njóta þessa nýja áfanga í botn, svona innan marka þess sem heilsan leifir.

Þetta er eins og með gömlu bílana. Við þurfum frekara viðhald eftir því sem við eignumst fleiri ár.

Á afmælisdaginn minn var ég hálf döpur, svona innan um og saman við. Það hrúguðust upp alls konar minningar sem mér tekst reglulega vel að láta í friði og ég var ekki par hress með þær.

Nú er ég búin að ná mér aftur á strik en ætla að koma mér í gír til þess að skrifa um hörmungar drykkju náinna ættingja, ekki endilega minna ættingja heldur almennt. Það er þetta andstyggðar brennivíns frumvarp sem er að valda mér hugarangri og vekur upp þessar hugsanir mínar.

Ég ætla ekki að skrifa um þetta í dag, ég er enn að melta með mér hvað ég ætla að taka fyrir. Nægilegt efni er til. Hörmungar ofdrykkju og hvernig þær leggja heilu samfélögin í rúst er vel þekkt en ekki mikið rætt. Þetta er jú samfélagsmein sem best er að láta liggja kyrrt og endilega ekki að tala um.

Við getum talað um allt milli himins og jarðar og helst það sem skiptir í raun engu máli.

Það sem skiptir máli er að allir  græði sem allra mest og þá þarf ekkert að vera að velta sér upp úr einhverjum smá óhöppum sem verða hér og þar, jafnvel þó það heiti ofdrykkja.

Brennivín í matvörubúðir er markmiðið.

Nú er komin ný verslun á Íslandi og einhvers staðar sá ég að þar verði brennivín til sölu með matvörunni. Veit ekki hvort það er rétt.

Þessi nýja verslun er held ég að bjóða nokkuð sæmileg verð fyrir heimilishaldið.

Hvert renna skattar þessa fyrirtækis?

Borgar það skatta til íslenska ríkisins eða renna peningarnir í sjóð erlendis?

Ég spyr auðvitað eins og fávís kona en mig langar til að vita þetta.

Ég versla aldrei, aldrei í búðum hér í Portúgal sem ekki borga skatta til samfélagsins. Það getur verið að ég þurfi að borga aðeins meira fyrir vöruna en þar sem ég legg minn skerf til samfélagsins ætlast ég til þess að aðrir geri það sama.

Er það óréttlát krafa?

Hulda Björnsdóttir

 

Matarvenjur

20.maí 2017

Matarvenjur okkar geta verið margvíslegar og er ekkert nema gott eitt um það að segja.

Ég er ekki sérfræðingur í mat og hef í raun harla lítið vit á því hvað er gott og hvað ekki.

Nú á dögum er í tísku að borða Chia fræ og Goji ber, allavega hér í Portúgal.

Turmerik er líka komið á vinsældalista í landinu.

Allt er þetta vegna þess hve þjóðin er mikil um sig og sykursýki og hár blóðþrýstingur algengir sjúkdómar hérna.

Læknar ráðleggja fólki að leggja af en svo er eiginlega eftirlitið búið.

Fólk fréttir af fræjum og kryddum og berjum sem eiga að lækna allt.

Þegar komið er á heilsugæslu er blóðþrýstingur mældur og fólk er vigtað.

Nú borða margir heil ósköp af hinum hollu berjum og fræjum og skilja ekkert í því að allt í einu fer að bera á einkennilegri hegðun hægða, blóðþrýstingur hækkar þrátt fyrir lyf og eitt og annað dularfullt skýtur upp kollinum jafnvel þó mikið sé notað af öllu mögulegu heilnæmu. Hnetur og fræ á hvers manns diski og allt í einu er ofnæmi komið til sögunnar.

Alls konar smoothies eru blandaðir og þeir ásamt fleiru eiga að vera lausnin.

Fyrst eru rætur, grænmeti og ávextir settir í safavélar og svo dettur blandan ofan í mixerinn. Allur hinn dásamlegi safi, hinn heilnæmi almáttugi safi er svo drukkinn og öllum líður dásamlega.

Þetta er svo fyrirhafnarlítið, bara að drekka eða þamba drykkinn og ekkert að hafa fyrir því að tyggja eða vesenast með hnífapör og svoleiðis.

Mér verður alltaf pínúlítið illt þegar ég hugsa til þess hvernig safakúrar, fitukúrar, bananakúrar, agúrkukúrar og hvað þeir allir heita, taka yfir matarvenjur fólks.

Er ekki til eitthvað sem kallað er súkkulaðikúr? Ég væri til í að prófa hann og dræpist líklega mjög fljótlega svo best að láta hann vera.

Mamma var mikill sjúklingur allt mitt líf og eitt sinn fór hún á heilsuhælið í Hveragerði sér til heilsubótar. Hún kom heim með fullt af uppskriftum af heilsusamlegum réttum sem ég elskaði frá fyrstu stundu. Svo var ég í skóla þar sem maturinn var ekta grænmetisfæði og við urðum ástfangin um leið.

Grænmetisfæði er ekki bara kál. Grænmetisfæði er unaðsleg blanda af ýmsu því sem ræktað er á jörðinni en etur ekki plöntur og gras. Grænmetisfæði er ekki safasull, það er tuggið og borðað með hníf og gaffli á vesturlöndum en með prjónum í Kína. Það er grænt unaðslegt brokkoli sem maður bítur í og nýtur litarins þegar maður horfir á það. Það eru baunir, alls konar baunir, soðnar og búnar til kássur og buff. Það eru gulrætur sem brosa falleg og breiða úr appelsínugula litnum þegar bitið er í þær og allar yndislegu trefjarnar binda vatnið og hjálpa æðunum að blómstra og taugaendum að brosa.

Svo er hinn yndislegi fiskur hjá þjóðum sem eru svo heppnar að fá ferskan fisk oft á tíðum beint upp úr sjónum. Fiskurinn er uppspretta lífsins hjá sumum og öll dásamlegu efnin sem hann ber með sér fá að njóta sín og hjálpa líkamanum að tikka.

Sumir grilla fiskinn og hann heldur öllu sínu, aðrir gufusjóða hann og njóta gæðanna og enn aðrir drekkja honum í olíu eða sjóða í mauk. Fer allt eftir smekk hvers og eins.

Ég er þeirrar skoðunar, og það er bara mín skoðun og allir aðrir mega hafa aðra skoðun, að matur sem er mauksoðin eða steiktur í spað sé í raun og veru myrtur með köldu blóði.

Svo er það vatnið. Vatnið sem er stærsti partur líkama okkar og við drekkum svo sparlega, rétt eins og um gull sé að ræða sem ekki má eyða í vitleysu. Það er alveg sama hvað ég borða hollan mat, drekki ég ekki nægilega mikið vatn, og gæti þess að fá nægilegar trefjar er allt unnið fyrir gíg.

Sumir borða hráfæði, sem er grænmetisfæði sem ekki er soðið, held ég. Ég þekki það ekki, hef bara heyrt um það. Ég á bók um það og las mér aðeins til í henni en fannst þetta svo flókið og seinlegt að ég gafst upp.

Allar öfgar eru af hinu illa, held ég.

Ég borða aldrei rautt kjöt. Mér finnst og hefur alltaf fundist það vont. Ég borða hins vegar túnfisk sem er rauður, svo þetta tengist ekki litnum. Túnfiskurinn minn fer á grillpönnuna mína og er sæll og glaður þegar hann fær salat og avokado eða eitthvað sérstakt með. Svo þykir honum líka stundum gott að fá sætar kartöflur sér við hlið á meðan hann grillast. Sætar kartöflur eru mitt uppáhald og líka mjög hollar. Ég borða aldrei venjulegar kartöflur og saltfiskur finnst mér ógeðslegur.

Ég elska lax og silung. Við fáum auðvitað aldrei silung hér í landinu mínu en lax er á boðstólnum. Grillaður lax er gómsætur.

Líklega er ég matvönd, svona þegar ég hugsa um það. Ég borða ekki hvað sem er.

Ég vil vita hvað er í sojamjólkinni minni og þess vegna bý ég hana til sjálf.

Ég vil líka vita hvað er í brauðunum mínum og þau koma úr bakarofninum mínum. Ég lærði hjá Sollu á Grænum kosti fyrir mörgum mörgum árum að búa til himneskt brauð og hef haldið því. Það er frábært að vita upp á hár hvað er í brauðinu mínu.

Ég borða ekki kúaost. Mér finnst hann vondur og held að kúamjólk sé ekki sérlega góð fyrir mannfólkið. Bara mín skoðun. Ég elska geitaost og geitamjólk. Þær eru svo krúttlegar og litlu krílin bræða úr mér hjartað þegar verið er að mjólka þær. Veit ekkert hvað það er sem mér finnst svona unaðslegt í fari þeirra en svona er þetta bara. Þorgerður snillingur sagði mér frá geitavörunum fyrir mörgum árum og ég trúi henni.

Mamma, heilsuhælið í Hveragerði, skólinn minn á unglingsárunum, Solla á Grænum kosti og Þorgerður ásamt kínverskum vinum eru þau sem hafa mótað matarvenjur mínar. Læknarnir mínir eru ánægðir með matseldina mína og ég nýt þess að borða með hníf og gaffli og stundum með prjónum.  Ég fæ mér stundum smoothie úr berjum og nota frosna banana til þess að gera þá undurmjúka. Þetta eru aukabitar en ekki aðalmáltíð. Stundum bý ég til ís úr avokado og er hann himneskur.

Það er svo margt hægt að gera úr góðu hráefni en kannski er mikilvægast að detta ekki niður í öfgakúra og athuga hliðarverkanir berja og krydd jurta. Bara mitt álit.

Hulda Björnsdóttir