Hvar er baklandið fyrir þá sem komnir eru á eftirlaun?

7.apríl 2017

Er eitthvað bakland fyrir eftirlaunaþega sem styður við bakið á þeim og berst fyrir réttindum þeirra og passar upp á að ekki sé troðið á þeim á skítugum skónum?

Það voru bundnar miklar vonir við Gráa herinn og er hann með rúmlega 7 þúsund like á Facebook síðu.

Herinn hélt stóran fund í Háskólabíó fyrir síðustu kosningar og nú átti að taka þingmenn á beinið.

Hótað var að 40 þúsund atkvæði væru í boði.

Svo töluðu hermenn hver við annan í sjónvarpsviðtölum og útvarpsviðtölum.

Annað slagið bregður stjórnarmönnum Gráa hersins enn fyrir í fjölmiðlum þar sem þeir fara mikinn og tala um eitt og annað.

Búið að skipta um formann í Félagi eldri borgara í Reykjavík svo Þórunn H. hefur meiri tíma fyrir herinn, eða svo held ég að hljóti að vera.

Já, vel á minnst. Þórunn H. hefur verið í forsvari fyrir verkakvennafélag árum saman og á sinn þátt í hvernig farið hefur verið með greiðslur í Lífeyrissjóði og þær notaðar sem skiptimynt við gerð kjarasamninga.  Bara að minna á þetta ef einhver væri búin að gleyma þessu.

Mér hefur oft ofboðið hið gengdarlausa þekkingarleysi sem hefur skinið í gegn í þessum rosaflottu viðtölum. Ég nenni ekki að eyða orku í telja þau upp. Fólk getur bara hlustað á ruglið sem oft hefur glumið í eyrum.

Upplýsingastreymi Gráa hersins er grátt og í móðu.

Gerist fólk svo ósvífið að grennslast fyrir um hvað sé í gangi er oft ekki mikil birta yfir svörunum og þau oft á tíðum óskiljanleg með öllu.

Hroki gæti maður sagt.

Ég held reyndar að fólk sem svarar á Gráa hers mátann geri það vegna fákunnáttu og ótta við að hægt sé að sjá í gegnum um móðuna.

Grái herinn er ekki bakland fyrir eldri borgara, það er alveg ljóst.

Landssamband eldir borgara virðist ekki styðja við bak baráttu eldri borgara.

Landssambandið virðist reyndar vera upp á kant við ýmis félög innan sambandsins, rétt eins og sum aðildarfélög ASÍ eru ekki par hrifin af forystu ASÍ.

Velferðaráðuneytið styður ekki við eldri borgara. Því ráðuneyti finnst litlu máli skipta þó vitlaus lög séu samþykkt á alþingi.

Formaður velferðanefndar skilur ekki lögin um Almannatryggingar og heldur að allir eigi bara að vera ánægðir með "fátæki"gildruna sem þau púrra fólki niður í.

Ég held reyndar að fáir, ef nokkur, alþingismanna skilji lögin. Eftir 10 ára yfirsetu og endurskoðun eru þau enn óskiljanlegri en fyrir breytingu.

Eitthvað hefur nú kostað að sitja yfir breytingum í 10 ár. Ekki skal mig undra að nefndarmenn hafi verið ánægðir með sporsluna þá.

Nú er Flokkur fólksins að fara í mál við ríkið vegna leiðréttingar á hinum alræmdu nýju lögum.

Búið að fá lögfræðing til að reka málið og einhver gangur kominn í það.

Ég veit ekkert hvort þetta mál vinnst eða ekki. Gæti alveg trúað því að það tapaðist.

Þrátt fyrir það ætla ég að láta skrá mig sem part af þessari málssókn. Þegar þetta mál er komið á hreint er nefnilega hægt að hætta að tala um það og velta sér upp úr því, og komin grunnur til að snúa sér að aðalmálinu sem er rán ríkisins á sparnaði okkar í Lífeyrissjóð.

Við höfum greitt alla okkar starfsæfi skatta, svo framarlega sem við höfum ekki svikið undan skatti. Vegna skattgreiðslu eigum við rétt á bótum frá Almannatryggingakerfinu.

Við höfum greitt alla starfsæfi okkar í Lífeyrissjóð, allavega þeir sem hafa farið eftir lögum landsins, og það hefur verið sparnaður okkar til efri áranna. Sparnaðurinn og trygging samfélagsins, Almannatrygginga kerfið, áttu að sjá til þess að við dræpumst ekki um leið og við hættum að vera gjaldgeng á vinnumarkaðinn.

Sumir, og þó nokkuð margir, hafa haft miklar tekjur og eiga þar af leiðandi mikinn, gríðar mikinn, sparnað í Lífeyrissjóði og fyrir þá hópa skiptir Almannatrygginga kerfið ekki svo miklu máli.

Fyrir okkur hin, sem höfum verið venjulegir launþegar, horfir málið allt öðruvísi við.

Við sem höfum sparað alla æfi í Lífeyrissjóð eigum ekki að niðurgreiða með sparnaði okkar, bætur til þeirra sem aldrei hafa sparað.

Eins og kerfið er núna þá gerum við það og þetta er stóra málið sem þarf að fá úr skorið fyrir dómstólum. Hins vegar er þetta svo stórt mál að öflugt bakland þarf til að reka það og er það ekki á færi smáflokks.

Smáflokkurinn getur hins vegar, með stuðningi þeirra sem hafa áhuga, fengið skorið úr fyrir dómstólum hvort hægt sé með einu pennastriki að breyta lögum afturvirkt, eins og gert var í tilfelli nýju laganna um Almannatryggingar.

Ég ætla mér ekki að ganga í Flokk fólksins en ég ætla mér að styðja og vera aðili að málsókninni.

Auðvitað verður hver og einn að gera upp við sig hvað hann vill og sumir telja framtak flokksins gott og aðrir ekki. Allar skoðanir eiga rétt á sér og eru jafn mikilvægar. Við þurfum hins vegar að losna við þetta mál til þess að hægt sé að hefja mál númer 2.

Hef ég trú á því að Grái herinn geri eitthvað annað en að fela fyrir stuðningsmönnum sínum hvað hann er að pukrast með?

Nei, það hef ég ekki.

Ég skil reyndar ekki þetta fyrirbæri sem herinn er og hef aldrei skilið. Mér finnst þetta líkjast dálítið litlum saumaklúbb sem snýst um sjálfan sig og er bara sáttur.

Hulda Björnsdóttir

 

 

 

 

 

 

 

 

Athugasemdir

[Kolbeinn Pálsson, 7.4.2017 kl. 21:35]

Hulda, Ellilífeyris/Ellistyrks ránið er sennilega stærsta rán sem sauðsvartur almúginn á ellilífeyrisaldri hefur orðið fyrir!!!

Það eru tvær leiðir:

A: Hópmálssókn til að endurinnsetja fullan og óskilyrtan Ellistyrk/Ellilaun til allra.
Endurheimta þjófstolinn Ellistyrk og afturvirkt að fullu!!!

B: ráðast á allt opinbera Lífeyriskerfið og krefjast þess að enginn opinber starfsmaður fái greitt meira úr lífeyrissjóðum ríkissins, en sjóðirnir geta greitt samkvæmt reiknuðum inngreiðslum lífeyrisþega. þ.E.A.S. Ríkinu verður stillt upp við vegg og bannað að bæta upp skerðingar.

Þar sem ráðamenn, stjórnkerfið ráðuneytisstarfsmenn, ráðherrar, þingmenn, sendiherrar fái aðeins greitt í hlutfalli við það sem þeir sannanlega greiddu inn og lífeyrissjóðir þeirra töpuðu ekki!!!

Sjáðu til eftir skerðingar lífeyrissjóða fyrirmannanna,eins og sauðsvartur almenningurinn hefur verið skertur, þá munu þeir snarlega endursetja fullann Ellilífeyri.
Þeir munu ekki lengur hafa efni á að sleppa þeim pening (200.000 + )sem núna skiptir þá litlu sem eingu.

Núna er staðan sú að þetta fólk sem stal Ellistyrk sauðsvarts almennings án þess að blikka auga fær svo mikið úr lífeyrissjóðum, sem það greiddi aldrei í til samræmis sem það fær með því að ræna sauðsvartann almenninginn fær svo mikið greitt úr þeirra lífeyrissjóðum, sem sauðsvartur almenningurinn er skattlagður og látinn borga (Rúinn inn að skinni) að þessu fólki munar ekkert um að ellistyrkurinn fari úr rúmlega 200.000,- í 0kr.

Þetta fólk fær svo mikið greitt úr þeirra lífeyrissjóð sem sauðsvartur almenningurinn er Rúinn inn að skinni til að borga í það sem á vantar til að það geti lifað í vellystingum, andstætt vilja sauðsvarts almenningsins, sem finnur þjófnaðinn á eigin skinni og þarf að halda þessu fólki uppi með því að vera skert og stolið af því sem þeim ber.

[Hulda Björnsdóttir, 9.4.2017 kl. 11:48]

Kolbeinn,

Takk fyrir athugasemdina þína. Þetta er allt saman hárrétt hjá þér og ég get engu bætt við.

Ef hægt væri að fá stjórnmálamenn til þess að standa við fögru loforðin, sem almúginn kaupir fyrir kosningar, gæti þetta breyst. Ég skil ekki hvað það er íslenskri þjóðarsál sem lætur spillinguna endalaust grassera.

Kv. Hulda Björnsdóttir